‘Life is for pleasure, not pressure.’
雖然香港係亞洲數一數二嘅繁華城市，但由聯合國永續發展解決方案網路（Sustainable Development Solutions Network）公布2019年《世界幸福報告》（World Happiness Report），香港人响156個地區中只排第76，反映香港人嘅壓力指數相當高，考試啦、供樓啦、裁員啦、減肥啦，形形色色嘅壓力充斥住呢個國際都市。而身為職場新鮮人嘅你，以下嘅故事或許能引起你嘅共鳴：
記得五年前讀理大嘅最後一個月，功課壓力好大，日日都做到好夜。有一日上Dr Li嘅堂，我哋成班同學要為功課演說日期抽籤，結果我好黑仔抽到下下籤，日期同我另外三份功課嘅死線撞期，心情真係好頹。望住呢支下下籤，當時嘅我忍唔住喊咗出嚟，結果有個同學仔主動跟我對調演說日期，Dr Li知道原因之後，好淡然咁講咗句：「Life is for pleasure, not pressure.」
今日我已經進身社會大學，身處職場，死線係以小時計，個個崗位都有自己嘅壓力。諗番起Dr Li嗰句「Life is for pleasure, not pressure」，我就提醒自己一定要享受工作過程，而唔係承受工作壓力！
香港人，Life is for pleasure, not pressure.
